立會新丁上堂 舊人講書

【明報專訊】喺新一屆立法會中，有差唔多30人都係新丁，相信好多事務都仲要熟習，立法會一連幾日為佢哋開班講課，噚日就講到立法會其中一個重要職能：立法。向一眾新人講立法程序、法案委員會等內容，唔係立法會秘書處，亦唔係法律顧問，而係工黨何秀蘭同經濟動力梁君彥。


民建聯梁志祥噚日都有去上堂，話立法程序的確繁複，佢話印象最深刻嘅係梁君彥教路時講到，其實佢哋都係要「邊學邊做，好難記晒咁多嘢」。梁志祥話，雖然法案委員會複雜，如果議題適合，佢都會加入委員會學吓嘢。呢幾日議員都會繼續上堂，星期五佢哋就綵排宣誓。


謝偉俊請自由黨食檸檬

另外，建制派噚日亦傾過會議廳座位安排，獨立嘅謝偉俊透露，原本自由黨想叫佢調位，方便同自由黨一齊坐，但謝偉俊堅守，最終佢哋要自己諗計；工聯會暫時就決定一排過坐。其他現任議員，就大都留守自己位置。


今日建制派將開會傾各委員會主席人選，民建聯葉國謙透露有興趣做保安事務委員會主席，佢話做主席同為《基本法》23條護航無關，而係眼見過去委員會議員意見不受尊重，又話唔明點解以往要兩星期開兩次會咁密。