顧雛軍出獄 高調「伸冤」

【明報專訊】當年被控虛報註冊資本罪、不披露重要信息罪、挪用資金罪、曾經喺「資本巨人」的格林柯爾董事長的顧雛軍飽受7年牢獄之災，9月初終於重獲自由。佢第一時間開通微博，邀請記者噚日參加佢嘅新聞發布會。


顧雛軍對佢出監之後嘅開場show落足心機，戴咗頂上面寫住「草民完全無罪」嘅帽，喺媒體瘋狂嘅閃光燈之中，高調開始咗佢嘅「伸冤」。佢話自己出監前兩個月喺網上睇到一篇名為《民營企業家顧雛軍的牢獄之災》嘅文章，大意係顧雛軍被正式定罪之前，最高檢黨組曾考慮唔起訴佢，但最後唔知點解，不但無被釋放，仲被判坐監同罰錢。佢形容呢篇文章「重新喚醒了他已經被完全的絕望燒枯萎了的心」。


點名批評官員涉「貪污腐敗」

顧雛軍詳細描述佢嘅「冤情」，並否認所有指控，並點名批評證監會前副主席范福春、前公安部部長助理鄭少東、廣東省副省長陳雲賢、大連商品交易所總經理陳興強涉嫌「貪污腐敗」，陷害並偽造罪證。有趣嘅係，被佢點名嘅鄭少東，家都因為其他事件而被判死緩，身陷囹圄。


證監會噚日即刻喺微博回應話「相關人士要為言行負責」，陳興強亦聲稱要告顧誣陷。顧雛軍咁樣大聲「喊冤」，剛剛恢復嘅自由身，會唔會又遇到乜冬瓜豆腐呢？