外匯教父曾教小學

【明報專訊】立法會金融服務界有5個候選人，其中「白頭佬」鄧予立有個好響嘅「外匯教父」稱號， 但佢入行前原來係為人師表，做過一年小六級班主任，佢話以前教書要一腳踢，除咗體育科，幾乎所有科目都要教，所以佢對教育有少少感受，見到家國民教育科爭議，佢就話若當初政府無取消中史必修科，家就唔使搞國教科咁煩！

李君豪自稱履歷唔輸畀張華峯

講開呢個界別，證券行老闆張華峯資歷應最深，由出市代表做到老闆，正宗紅褲子出身，好熟行頭。不過，同樣係證券行老闆嘅李君豪就話，能力唔係淨係計工作年資，佢話如果咁計，佢14歲已經開始炒股，都有43年股市經驗，都唔畀張華峯弱喎，而且仲做過10年銀行，又係港交所董事，履歷唔失禮。


功能界別呢個遊戲唔係人人可以玩，要證券行老闆先有權投票，而公共專業聯盟甄文星係做上市公司保薦人，工會背景嘅林德明係交易員，有權參選，但自己都無權投票，所以係蝕底啲。


5個人爭1個位，總要有人輸，但百足咁多爪嘅鄧予立，就算選唔到都會好忙，因為佢每年都會四圍飛，巡視業務之餘必會順便旅遊，然後執筆寫旅遊blog，佢仲一早同出版商簽咗合約，會同另一學者合著香港外匯發展史！