彤叔﹕買珠寶好過買樓

【明報專訊】彤叔急急掟走澳博（0880）啲股票，9日之內套現過千萬，令大家都摸不著頭腦佢到底有乜大計。不過噚日在周大福（1929）嘅「稀世珍寶私人預覽會」上，佢就大大聲咁話「投資珠寶好過投資樓市」，話珠寶可以佩戴又可以收藏，仲預言未來珠寶價值會升幾倍添﹗唔通彤叔減持澳博，就係為咗增持啲閃令令嘅鑽石？


不過就算真係咁，小琴都冇錢學彤叔咁增持鑽石啦﹗噚日嘅預覽會上，有啲名貴嘅佩飾一件就已經過千萬，好似大會邀請嘉賓莫文蔚手上嗰隻重7.585卡、由127粒小鑽石鑲成嘅粉紅心形鑽戒，就索價差唔多1150萬﹗莫文蔚仲戴左一條300幾萬嘅頸鏈，同埋一對77萬嘅鑽石耳環，成兩千幾萬戴在身上，睇到都覺得好重。不過莫文蔚就笑到「衣」起排牙，笑容同啲鑽石一樣咁閃。


話說個預覽會合共展出總值30億元嘅珠寶，聽講有啲仲係彤叔多年嘅珍藏添﹗可惜彤叔佢淨喺周大福個新會員計劃開幕禮上露一露面，同莫文蔚一齊完成左個開幕儀式就悄悄走咗，如果唔係，一定會問問佢買鑽心得同故事啦﹗雖然無緣同彤叔傾下計，但開幕式上面展示嘅個粒鑽石話唔定正係佢老人家嘅極品珍藏之一：一粒重達102.88卡嘅圓角階梯形艷彩黃彩鑽，仲粗過隻手指﹗

呢場預覽會其實擺明喺請名人去，因為佢主要推銷周大福新設嘅鑽石會藉，只要成為佢地嘅會員，以後買首飾都可以八五折。


email:piano@mingpao.com