梁粉何喜華升呢做院士

【明報專訊】大學每年都會頒發榮譽博士、院士等，通常都會畀社會賢達或者學術地位高嘅人士，嶺南大學噚日就公布，將會頒發榮譽院士畀社區組織協會主任何喜華，表揚佢多年為弱勢社群服務，Emily都要恭喜佢！何喜華除咗做關顧弱勢社群嘅工作，早前仲幫特首梁振英CY安排落區活動，又支持CY參選特首，而CY曾經係嶺大校董會主席，何喜華今次獲嶺大表揚，唔知兩者有無關係呢？

Emily都好想問嶺大公關，大學係點樣甄選榮譽院士名單，不過無論如何，多年以來扎根深水埗嘅何喜華，為新移民、露宿者等弱勢社群盡心盡力，今次獲表揚係實至名歸。但係，Emily就好有興趣想知，到咗10月15日嘅頒授儀式，何喜華會唔會照舊著招牌牛仔褲同T恤出席典禮。


唐唐支持者黃友嘉亦獲院士

嶺大今年嘅頒授名單，除咗梁營支持者，亦有提名唐英年參選特首嘅中華廠商會永遠名譽會長黃友嘉。黃博士專門研究經濟，政府公職多多，CY早前委任佢加入經濟發展委員會籌備小組，幫手為香港經濟發展度下計。


除咗何喜華同黃友嘉，另外3名獲頒榮譽院士人士，包括美國華美銀行董事長吳建民、新加坡華僑銀行行政總裁錢乃驥，同埋南洋集團副常務董事榮智權。