CY亂餵奶 大仔變肥B

【明報專訊】特首梁振英（CY）接受港台節目《舊日的足跡》訪問，節目大部分時間都拋開嚴肅一面，大談家庭事，有兩女一子嘅佢提到當年初為人父時，都有自行放侍產假，其中大仔梁傳昕仲係BB時，CY當然有幫手餵奶，但發覺餵完唔夠一陣，阿仔又喊，於是CY就決定唔按時間，只要阿仔一肚餓喊就有得食，結果喺傳昕3個月大時，就重達30磅！

3個月重30磅

CY話當時佢比較多時間，仲搵格仔紙畫低阿仔幾時食奶、每次食幾安士，結果阿仔肥肥白白，由出世時嘅7磅幾，3個月後已重30磅，連健康院護士都嚇一跳，誤會同警告CY唔好用「米水」餵阿仔（有唔少人都覺得，用煲飯嘅米水開奶會更有營養）。最終30磅呢個紀錄，維持到傳昕1歲大。


上任個幾月，CY話佢仲未搬入禮賓府，因為禮賓府要換屋頂瓦片，早前打風禮賓府仲漏水，預料換晒所有瓦片要兩個月，所以佢大約秋天就會搬入去住。


雖然當選特首，但CY話盡量都想過普通人生活，家同過去最唔同嘅，就係行街、睇戲、食飯都要一早計劃，等警察做好保安安排。