湯家驊麻布袋殺入格仔舖

【明報專訊】落區派單張可謂選舉平常事，但拉票拉到入舖，就真係少見。喺新界東出選立法會嘅公民黨湯家驊（Ronny），近日製作咗一套相當精緻嘅宣傳品，仲擺喺大埔一間格仔舖寄賣，雖然多後生仔駐足觀賞，但暫時銷情麻麻。


暫時銷情麻麻

Ronny同競選拍檔楊岳橋（Alvin），近日以佢哋個嘜頭推出麻布購物袋，方便師奶買餸，希望吸盡師奶票；另外又以「八千里路雲和月」嘅墨寶印製file，全部擺喺一間格仔舖寄賣。購物袋盛惠30蚊，file就3蚊一個，收益全數撥歸選舉用途。


格仔舖老細係公民黨之友，唔單止提供舖位，門口仲貼埋Ronny嘅選舉單張，認真唔話得。雖然Ronny成功入舖，但都大呻拉票愈來愈難，事關好多屋苑唔畀佢哋貼海報，喺屋苑附近嘅公眾地方拉票都畀人趕，比上屆立法會選舉難做好多。


參選新東嘅名單仲有梁國雄、陳克勤、田北俊、劉慧卿、張超雄、葛珮帆、黃成智、葉偉明、龐愛蘭、方國珊、陳志全、范國威、龐一鳴、蔡耀昌、邱榮光、陳國強、何民傑及梁安琪。