學民思潮替明哥站台

【明報專訊】達明一派「兜兜轉轉演演唱唱會」下禮拜開part 2，一向關心時事嘅黃耀明之前發信畀特首梁振英、政務司長林鄭月娥同埋教育局長吳克儉，邀請佢哋欣賞下禮拜六（18號）嘅演唱會，但係繼林鄭以「公事繁忙」拒絕後，吳克儉噚日又請明哥食檸檬，不過，明哥同步發布好消息，就係學民思潮同學將會為演唱會站台兼獻唱﹗

吳克儉話「另有安排」

明哥噚晚喺facebook發布壞消息同好消息，壞消息係畀國民教育科爭議搞到頭痕嘅吳克儉，回信畀佢話「另有安排」，所以唔能夠出席達明演唱會。


另一邊廂，之前日日狙擊吳局長嘅學民思潮同學仔，已經答應為達明演唱會站台兼獻唱，「好消息」一出，令網民相當期待。學民同學仔平時遊行嗌口號有氣有力，唔知歌藝又如何呢？Emily拭目以待。