Google流行搜尋 暗藏商機

【明報專訊】小琴經常會用Google搜尋器搵資料，亦會從搜尋器顯示嘅熱門關鍵字了解到近期流行話題，但原來除咗緊貼潮流，掌握到市民用搜尋器嘅習慣，都可以帶來商機。


噚日Google就發表咗份報告，統計啲人響夏天會有咩搜尋喜好，等商家可以從中多啲了解，進行恰當宣傳。原來響夏天，大家唔單止關心會唔會打風，仲會因此特別關注防雨用品嘅資訊，好似遮、水靴、雨衣等等都會明顯多咗人搜尋。


雨水外遊夏季熱門關鍵字

除咗打風落雨，放暑假當然要出去玩，所以有關旅遊嘅資料都比較多人搵，例如冲繩、布吉、峇里就係夏季三大熱門搜尋勝地；另外諸如書展、美食展、電腦展呢啲暑期大型展覽，都特別多市民搜尋。


咁去得玩，旅遊用品自然唔少得，因此好似相機咁亦都會多咗人搜尋，尤其係防水相機，反映市民響夏天鍾情水上活動。