eBay分類廣告 免費任「鋪」

【明報專訊】eBay最近將個分類廣告網站Gumtree重新執過嚟，仲改埋名叫Kijiji，即係台灣好出名嗰個奇集集網嘅香港版本。噚日小琴同eBay分類廣告亞太區總經理趙芬妮傾過偈，佢就話網站主打個人或中小企，佢哋可以免費上嚟「鋪」廣告，透過平台去賣產品，最正喺以後搵樓都可以上去睇定先。


地產廣告做強項搵樓可睇定先

網站最大特色係唔使錢賣廣告，將啲產品資料同聯絡方法擺上去就得，中間完全無任何手續費，可以擺足120日，只要唔係重複就唔會有上限。咦！咁個網點賺錢呢？芬妮話啲廣告好多，部分熱門嘅種類如地產咁，可能一日之內已經多到掩蓋咗啲舊嘅廣告，咁用戶可以畀錢買個靚位擺喇。例如60元喺網站首頁度登7日，或者畀10元將個廣告排返去前面。


總經理趙芬妮 業餘當歌手

佢又話，今次新改版加埋中文入去，可以由以前只係做外國人生意，變成連本地市場都攞埋。佢知道香港人成日要搵樓，就強化咗個地產分類廣告，用家好方便就可以根據自己個預算，同埋心水地區嚟搵樓，小琴試過吓都覺得係幾方便，始終上面有成2萬個廣告，逐個睇真係有排都未睇得晒。


講開賣廣告，芬妮係一個業餘唱作歌手，之前有好多作品，仲拍過MV