領匯股東會慘變示威大會

【明報專訊】噚日領匯（0823）喺酒店開股東會，雖然出席嘅小股東都唔少，但門口嘅「不速之客」就更多﹗一朝早，長毛梁國雄就聯同民間團體「領匯監察」去到股東會門外示威，大家群情洶湧，你一句、我一句咁大叫口號，令到啲小股東開完會後想走都走唔到，現場工作人員一邊大嗌「唔該讓條路」、一邊被啲示威人士鬧，幾番擾攘先從人群中迫到一條隙出嚟。


不過都唔怪得啲示威人士嘅，佢哋當中有好多都係上咗年紀嘅公公、婆婆，有可能係負擔唔起領匯嘅租金而被迫結業嘅小商戶，所以先表現得咁激動。


佢哋大鬧領匯靠「飲血」而「發過豬頭」，不過領匯傳訊總監潘啟迪就回應話，公司3年先調整一次續租租金，應該可以減輕商戶對加租嘅憂慮。上財年嘅續租調整率喺21%，即喺每年加租7%。


通過擴收購範圍至非商場

潘啟迪仲話，加租嘅調整幅度會因應商戶嘅不同情况而定，唔會加到超出佢哋負擔。佢話過去公司都有積極幫助商戶，包括推出商場活動帶動人流，仲有提供營運知識畀佢哋。至於個別商戶經唔起市場嘅挑戰，公司都冇可能好似政府咁減租幫佢哋，否則就會對經營得當嘅商戶唔公平。


另外潘啟迪又話，噚日嘅股東會上主要係討論領匯擴大收購範圍至非商場項目，例如工廈咁，議案並獲98％票數支持。而對於有市民強烈要求政府回購領匯，潘啟迪話，對此抱開放態度喎。


email:piano@mingpao.com