周文耀為金勞詹站台

【明報專訊】香港啲中小經紀行生意難做，唔少人都牙痛咁聲，但係總不能終日愁眉不展，前晚金融服務界就有個聯歡晚宴，小琴「掹車邊」做座上客，一坐低就見到「金勞詹」詹培忠打頭陣，致辭兼高歌兩曲，用佢獨有嘅潮州腔唱出《我的祖國》，一下子就將個氣氛推上高潮。


之後到港交所（0388）前行政總裁周文耀上台發言，冇見阿Paul一排，佢依然咁風趣，一上台就話發言唔會超過3分鐘，皆因個「主場」係詹詹架喎！

耍手擰頭 唔選立法會

阿Paul又話，退休兩年幾相當enjoy，加上佢原來已經六十有五，夠秤享受唔少優惠，例如免費搭天星小輪咁，不知幾寫意。Paul落台後，小琴問佢會唔會選立法會，佢即刻耍手擰頭，似乎真係好滿意目前嘅生活模式，唔怪得喺個聯歡晚宴度為詹詹「站台」啦！


計小琴話，阿Paul嗰時喺港交所啲options咁和味，今時今日做議員，隨時遇上拉布就要馬拉松式開會，阿Paul梗係唔會攞苦嚟辛啦。


之前信誓旦旦話唔會再選立法會嘅詹詹，喺晚宴度就冇正面講會唔會競逐連任金融服務界議員。不過詹詹啲朋友（小琴不便開名），即係啲經紀行阿頭就笑佢「姣婆守唔到寡」，賭佢一定會競逐連任，加上詹詹喺業界聲望一向高，話佢連任冇難度喎。


email:piano@mingpao.com