中移小股東 出動基本法反股息稅

【明報專訊】中國移動（0941）換咗新董事長奚國華上場之後，第一次主持股東大會，差啲畀班小股東難到。「咁做係違反基本法同一國兩制」、「又話50年不變」一班小股東你一句我一句，仲拉埋基本法落水。小琴就咁聽嘅話，仲以為去咗立法會，唔係股東會添。


話說中移動呢幾年，都要代股東扣起10%的內地股息稅，搞到班小股東唔多like。佢哋覺得中移動既然喺香港註冊，點解仲要跟內地法規，要交埋股息稅。


大家都知買得中移動，都係為咗佢派息幾好，又夠穩陣，但年年咁扣法，回報自然打咗折扣啦。於是乎個個趁奚國華「新官上任」，梗係唔放過佢係咁質。


財務總監薛濤海好無奈咁話，因為業務主要喺內地，要跟返內地法津。同埋佢哋早幾年開始實施嗰陣，已經同國家稅務總局溝通過，但一直無回覆，咪要跟住做。


獨立非執董羅嘉瑞就話，其實係無違反基本法，但都會盡力幫班小股東爭取唔使扣。