重慶保安公司 申上市被爆大鑊

【明報專訊】上市雖然能一解企業資金飢渴，但企業都可能因為被起底而爆出大鑊。內地近排就有一間叫重慶保安集團嘅公司，夢想成為內地保安行業第一股。集團來頭唔細，話係由重慶市公安局出資組建，但咁啱內地就有條例規定，公安局係唔准參與保安行業經營嘅，搞到保安集團唔單上市夢碎，公司經營係唔係合規都成為問題。


呢間重慶保安集團成立於2011年7月，嗰時重慶「唱紅打黑」正係搞得熱火朝天，呢個保安集團嘅董事長高正超響集團成立儀式上就宣揚，公司未來將謀劃上市。佢仲講明，集團其實收編咗重慶公安機關旗下40個區縣嘅保安公司，主要從事諸如銀行保安、大型活動保安等高級業務，基本上唔做住宅社區保安。集團成立時已擁有保安4萬人，未來5年仲可以擴張到12萬人。另外，集團都進行一項大動作，想要引入外資，成立中國第一間中外合資嘅保安服務公司。


「唱紅打黑」時成立 主攻銀行保安

但嗰位董事長舊年冇講到嘅就係，集團出資人其實係重慶市公安局，大部分高管亦都係警務人員，而原來內地早響2010年年初就有出台《保安服務管理條例》，嚴格規定國家機關工作人員係唔可以設立保安服務公司，亦都唔可以參與保安服務公司嘅經營活動。咁樣講來係法例出台在先、公司成立在後，保安集團明知犯法都正常營運壯大咗超過半年，到今日臨上市時又撞到重慶事件，睇來呢間公司真係生不逢時。


email:piano@mingpao.com