拉菲CEO 親到內地「打假」

【明報專訊】法國拉菲（Lafite）係世界頂級葡萄酒，價錢一向唔平，入場價隨時要一兩萬一支，有啲年份就賣到3、4萬一瓶。小琴都喺法國住過一排，當地人好似對呢個價位啲葡萄酒接受唔到，有個紅酒迷對小琴講，500歐元以上嘅酒都係炒作出來嘅。


拉菲來到中國，一經炒作自然身價倍增，拉菲全球CEO薩蘭本月底要親自來中國，不過，佢今次來唔係賣酒，而係為咗「打假」。拉菲銷售經理話，拉菲每年只生產20萬瓶，但中國市場每年會銷售60萬瓶，剩低個部分都係假貨。個經理仲話，中國市場只佔拉菲銷售十分之一，咁計一計，內地每年有58萬瓶假貨。


真貨年產僅20萬瓶 中國竟年銷60萬瓶

家內地假拉菲有兩種，一係仿冒，二係山寨，就好似「周六福」傍住「周大幅」，「九糧液」傍住「五糧液」咁。拉菲集團已經先後告倒「拉菲世族」和「拉菲帝國」兩支山寨大軍，其他訴訟也喺計劃之中。


總裁或趁機「營銷」

不過，有資料話，拉菲喺中國需求量舊年下半年就開始下降，家中國人也不想當「冤大頭」，更傾向買價格更實際、質量也不錯嘅葡萄酒。今年3月1日，拉菲已經喺山東蓬萊正式興建酒莊，成為繼阿根廷、智利之後，全球第三拉菲生產基地。咁樣睇來，拉菲都好重視中國市場，此番CEO親自出馬，名為「打假」，實際不妨理解為一次炒作，或者係「營銷」。如果完全無人仿冒拉菲，佢應該仲驚。


email:piano@mingpao.com