葉氏化工搞「陸上奧比斯」

【明報專訊】內地成日強調企業良心，社會責任，簡單講就係「取之於民，用之於民」，好似葉氏化工（0408）咁，原來佢哋靜雞雞響內地搞咗個慈善項目，從2008年開始分10年向內地唔同地區捐贈流動眼科手術車，義務為內地眼疾人士重拾光明，十足「陸上奧比斯」。
捐手術車去山區 方便過飛機
響2008年葉氏捐咗第一架手術車畀寧夏，第二架畀江蘇，去年第三架送去山東，而呢個月，再會有一架手術車送畀內蒙古。咁點解唔似「奧比斯」咁整架飛機呢？管理層同小琴講，飛機始終要搵機場停泊，內地部分貧困地區又點會有飛機，反而手術車仲能夠去更多地方幫更多人。
話時話，去年葉氏業績唔係咁理想，純利倒退咗成35%，CFO何世豪就派定心丸，解釋去年因為同時間幾種主要原材料價格大幅波動，先至會影響毛利，情况好少見，今年首季啲原料價已經穩定返，咁啲病人就唔使擔心公司會冇錢送手術車啦。