會計師公會 拍劇提升形象

【明報專訊】提起會計師，唔知大家會有乜印象？覺得都係一班好悶嘅數佬，定係專門幫奸商做數嘅師爺？小琴同會計師公會嘅骨幹傾偈，得知佢哋都好擔心公眾對會計師呢個專業形象唔係幾好，所以正同港台等電視台密斟，想拍番套電視劇講吓會計師點偉大。


似偵探尋真相 法證核數好過癮

講開又講，無綫連續劇拍過醫生、律師、警察、老廉同消防。會計師又真係好似唔多覺有拍過。咁又無他，會計師對住盤數，又有乜好拍。不過，會計師公會嘅朋友就話，例如做法證核數嘅會計師，就相當過癮，會好似偵探咁四處搵證據，尋出真相，今次同電視台傾，都會以法證核數為主軸。


朋友話早排無綫電視劇有一套拍馬國明做會計師，但原來係幫人洗黑錢，令會計師形象大打折扣。直至最近《當旺爸爸》裏面，做女嘅問老豆做會計師好唔好，老豆大讚，先至令會計師攞番啲分。