信義幫子公司 揀幸運股份代號

【明報專訊】可能大家都聽講過，綜合型玻璃製造商信義玻璃（0868）本身打算舊年將個搞太陽能業務嘅子公司「信義光能」分拆上市，不過最終受歐債危機影響，最終將個計劃暫時擱置。小琴噚日同信義行政總裁董清世食飯先知道，原來個陣管理層已經興致勃勃咁幫個「仔仔」揀埋股份代號，後三位數有齊6、8、9呢三個幸運number，同阿媽個「868」夠晒相稱。


董生就同小琴講，信義出身廣東，而廣東人就不嬲特別重視「攞意頭」，一定唔鍾意個代號入面有「4」咁嘅數字。計小琴話，如果信義真係相信幸運數字嘅力量，就要快啲定番個上市日子，咪一陣靚數字就畀人搶晒啦。


但話時話，好似呢啲主觀喜好，現實中就未必咁靈驗：停牌已經就快有兩個月嘅博士蛙，代號就係1698，聽落都幾吉祥啊，不過間公司來緊嘅命運，就比代號為444嘅Sincere Watch更加令人擔憂。