李智康：對「老婆」不滿 非惡鬥

【明報專訊】盈大地產（0432）股東會通過回購計劃，佢同基金股東Elliot Capital四年嘅冤家關係相信就此結束。盈大副主席兼行政總裁李智康噚日就似乎好感觸，被問到同Elliot係咪「惡鬥」，佢竟然話Elliot好似佢老婆一樣，對佢有不滿，唔代表係惡鬥。


股東期望有落差 分手較好

Elliot喺2008年不斷增持盈大股份，仲破壞咗盈大嘅私有化計劃。唔知係咪冤家鬥得耐，培養出「真感情」。不過李智康其後都話，唔同股東有唔同期望，部分股東應該明白盈大做緊大型項目，要保留資金，好難有派息。似乎暗示，Elliot嘅期望有落差，都係分手比較好。


唔少人力撐 當「小小超」係喬布斯

無咗一棵樹，都仲有個森林。話說噚日股東會就有唔少股東支持盈大，有股東仲話，當正盈大係蘋果公司，高風險會帶嚟高回報。果然係情人眼裏出西施，但小琴就好難從主席李澤楷身上，聯想到蘋果教主喬布斯啦。