陳觀展帶隊 去東江「睇水」

【明報專訊】新世界發展（0017）年初管理層大換血，純官鄭家純坐正主席後，率先喺特首選舉施展華麗轉身，咁純官公子、彤叔長子嫡孫鄭志剛（Adrian），升呢成為集團聯席總經理後，又做咗啲乜呢？出名工作狂嘅Adrian當然冇偷懶，原來新世界今年初內部成立咗個「集團可持續發展督導委員會」，Adrian就擔任呢個會嘅主席，同埋發表集團「可持續發展政策」。


據講呢個委員會，主要係配合新世界喺企業可持續發展方面，負責制訂相關政策同目標，帶領集團、員工、其他持份者以及整個社區，邁向可持續增長嘅未來。聽落有啲虛無，但其實個會已經好實在咁做緊嘢，頭炮就係由新世界另一位聯席總經理陳觀展，親自帶隊考察東江水嘞！


成立委員會 研可持續發展

陳總早排率領公司管理層遠赴廣東省東江水嘅源頭，再喺香港公開大學科技學院院長何建宗教授、廣東省水利廳及河源市政府嘅帶領下，沿住東江水流域參觀大型水務建設，視察水質及供水情况，等各員工對水嘅保育有更深切體會。陳總話呢次行程令佢感受到社會和環境嘅協調發展，同埋畀考察團團員喺水資源方面得到唔少知識。


新世界：純粹考察 不涉投資收購

不過小琴淨係想知，佢喺今次行程所得到嘅知識，包唔包括東江水務建設有冇投資價值咁。新世界公關就話，今次考察真係純粹係可持續發展督導委員會嘅活動，唔涉及任何投資或者收購喎。


email:piano@mingpao.com