周松崗快人快語 說話遭媒體誤解

【明報專訊】小琴上個禮拜六寫開，港交所（0388）新任主席周松崗禮拜五首次喺上市儀式露面時，講開有關信息披露法例修訂，佢話「現在已經遞咗去立法會，其中都有個民事跟進程序。」小琴當日話周主席唔知係咪搞錯咗，明明立法會已經啱啱三讀通過咗《2011 年證券及期貨（修訂）條例草案》，主席點解又話已經遞咗去立法會。原來周主席講嘅係呢條條例草案，仲有一份commencement notice（生效通知），會以附屬法例形式喺5月上立法會。


修訂草案「生效通知」5月上立會

港交所嘅公關大員澄清話，證券條例呢項修訂，會喺明年1月1日生效。雖然條例修訂案已經通過咗，但係嗰份生效通知，會以附屬法例形式於5月遞交立法會，所有附屬法例都會以Negative Vetting（即係若果有議員開聲，就要再議，若果冇人開聲就自動過關）形式處理，公關大員話雖然現時睇嚟冇議員會提出異議，但係都可能要等兩個月先至完成整個程序。當日周主席答記者問題時快人快語，記者聽起來未必明白佢嘅意思，希望隨住大家多交往，可以減少誤會。