人民網益人民 A股首日爆升74%

【明報專訊】有「官媒第一股」之稱嘅人民網噚日喺上交所上市，作為中央黨報《人民日報》嘅旗下網站，呢隻新股背景實力真係毋庸置疑，所以上市第一日立即大炒，熱度高到響一個鐘之內要停牌兩次。


開市一句鐘 兩度漲停

噚日A股9點半一開市，人民網開盤股價就已經去到31蚊人仔，比發行價20蚊高出55%，之後更升到34蚊，至約10時因升幅超過10%而要按例停牌半個鐘；到10點半復牌之後升勢始終未停，7分鐘內又因為交投率超過80%而又要停牌到收市前5分鐘。


最後呢隻「官媒第一股」首日收市報34.72元，比招股價高出74%，連帶其他內地傳媒股齊齊上揚。


雖然人民網首日表現強勁，但內地啲分析師就話投資者都係要小心為妙，始終升得咁厲害，令佢個估值過高，之後可以再大升嘅空間會變得有限。


有「阿公」撐腰 難與同業比較

其實以新聞網站嚟講，人民網嘅用戶訪問量同新浪、搜狐呢啲私營新聞網站差距仲好大，競爭力比較弱。


不過，調番轉頭講，佢背後有「阿公」撐腰，話晒都叫官媒，響地位上反而高過晒果啲私營媒體，唔怪得有分析員話，呢隻嘢情况太特殊，根本冇辦法同其他上市嘅媒體機構比較。