新華人壽亂送禮遭重罰

【明報專訊】內地做嘢講人脈靠關係，送禮請食飯呢啲真係在所難免，之不過為咗掩飾送禮所花嘅錢，而虛報開支就真係講唔通。好似新華人壽（1336）就因為咁，畀中國保監會重罰35萬人仔。


據保監會方面講，佢哋查到新華人壽嘅廣東分公司明明用成15萬買iPad去送禮，但響盤數度就話係用嚟買消毒用品，講真句，拎成15萬買消毒水，唔通間公司真係好多菌咩。除咗送禮費用亂咁報銷，間公司仲將原本用嚟做「業務推動費」嘅錢當禮金送畀人㖭。所以保監會查出問題之後，就決定重罰新華人壽廣東分公司30萬，涉事嘅職員就總共罰5萬。你話為咗掩飾嗰15萬送禮費，結果搞到畀監管部門點名批評兼罰35萬，呢舖都算得不償失囉。