梁高美懿退休 先旅行再嫁女

【明報專訊】自從恒生銀行（0011）一姐、副董事長梁高美懿宣布今年5月退休之後，不知幾多人問過佢會唔會加入政府，加入梁振英的新班子。噚日梁太同一眾傳媒食飯時，有記者再問梁太，「梁生」（振英）有冇搵佢？估唔到梁太幽默地回答一句﹕「梁生（即係佢老公）叫我返屋企喎。」


梁高早兩日已經講明，唔想入政府做官，畀下意見就冇所謂。其實梁太下個月11號之後嘅退休生活，已經早有計劃。6月佢會去澳洲旅行，實行上山、下海、打高爾夫去。


去完旅行返嚟，又要開始為嫁女做準備。梁太做銀行界嘅細女將會喺11月結婚，未來「蝦籽餅」都係喺銀行界工作。連同梁太大女都喺銀行做，咁即係雖然梁太退下火線，日後一家人仍有3名成員喺銀行界工作。講到嫁女，言語間梁太都有啲唔捨得，不過日後女同女婿都會住喺梁太附近，話唔定嫁女等如多咗個仔呢。