夏佳理獲股東祝福 小加被窒

【明報專訊】夏佳理噚日卸任港交所（0388）主席，雖然俗語有話「人走茶涼」，但港交所啲小股東好有人情味，喺股東大會後同夏佳理講多謝，讚佢呢6年來做得好，祝佢嚟緊有多姿多采嘅生活。夏佳理亦好識做，猛話港交所有今時今日嘅成績，絕非佢一個人嘅功勞，而係所有董事會成員、管理層同全體員工嘅努力成果。


不過，港交所行政總裁李小加就有「差別待遇」，另一位小股東質問小加總裁，話喺Paul Chow周文耀年代，新股冇咁多問題，點解小加上場後情况唔同咗。伶牙俐齒嘅李小加亦唔係省油嘅燈，呢位前賓架話呢兩件事有冇因果關係，佢唔知道，如果呢位股東能夠參透當中嘅玄機，小加都好願意研究吓！


嗰位小股東又話延長交易時間後，港股交投不斷萎縮，問交易所會唔會修正個政策。小加總裁就回應，交易時間同成交量冇必然關係，但係若果小股東證實到交易時間愈短、成交會愈多，佢都好願意早日實施咁話！