恒生推0.1%佣金優惠

【明報專訊】恒指近排升唔上又跌唔落咁，但成交量就陰啲陰啲咁跌，證券行、銀行生意都淡薄。恒生銀行（0011）就推優惠吸客，由即日起至6月30日開新證券戶口嘅客戶，喺開戶月起計頭3個月內，經恒生各自動化證券買賣渠道（即係 e-Banking同自動化證券買賣熱線），買賣港股同埋人民幣計價產品，可享0.1%佣金優惠，而且不限交易次數。


聽落似乎非常吸引，尤其散戶大多鍾意「密食當三番」，3個月內無限trade都係0.1%佣金，的確好似好抵。不過，小琴望真啲個優惠，原來每宗交易最低收費係100蚊港紙或85蚊人仔，換言之……即係要10萬元落單先至享受到0.1％嘅超筍優惠。


另外，全新優越理財或優進理財客戶所開立之新證券戶口，如果喺開戶月起計頭3個月內累積股票交易達3次，或總交易金額達到30萬，嗰個新開嘅港元及人民幣綜合儲蓄戶口，就有1厘港元及人民幣儲蓄存款年利率喎。