內地人寧出國買LV

【明報專訊】雖然祖國成日將擴內需掛響嘴邊，但係內地人出國買名牌嘅情况似乎有增無減，好似LV啱啱公布佢哋首季業績就反映呢個事實。雖然首季LV銷售收入增幅繼續保持雙位數增長，但係內地嘅銷售增長就明顯緩慢。


內地買LV 比法國貴45%

LV嘅CFO吉約尼（Jean-Jacques Guiony）仲話，佢地中國客戶嘅增幅比內地銷售增幅高，換句話說就係中國人情願響國外買LV，都唔肯留返響中國幫襯LV專門店。


當然，新年期間唔少內地人出國旅行，或多或少都會刺激到國外消費情况，但係出國買名牌點解依然係潮流，好大程度上係因為內地對奢侈品徵稅，好似LV啲產品，響中國買就比法國貴45%到47%。


其實去年開始，商務部就已經話要降進口稅同消費稅，等啲外國名牌唔駛響中國賣咁貴，之但係減稅關乎財政部稅收，所以兩部一直都未能夠達成默契，結果國民出國買名牌依舊。