證監打「虎」打到去終院

【明報專訊】證監會在幾年前電盈（0008）種票疑雲中，喺股東會上高調拉篋走人（唔係封舖拉人）一役，令證監由無牙老虎變身打虎英雄，而證監會另一單正宗打虎案──告Tiger Asia（老虎基金亞洲）內幕交易糾纏咗好幾年，今回終於鬧上終審法院，希望可以為呢單案嚟個了斷。


其實成件事由2009年8月開始，當日證監會指控Tiger Asia同埋3個高級職員Bill Sung Kook Hwang、Raymond Park及William Tomita，喺09年1月某日開市前收到風建行（0939）會配股，就搶先喺建行做單刁之前沽空咗先，之後再喺建行配股時入飛平倉，賺咗近3000萬。證監會2010年4月申請法院頒令禁止Tiger Asia喺香港進行任何上市證券及衍生工具的交易，同埋凍結Tiger Asia靠上述操作賺咗嘅2990萬元資產。


案件涉藉 建行配股內幕交易獲利

漫長嘅官司自此開始，好似睇電視咁，證監同Tiger Asia輪流上訴，有時拗埋啲法律觀點，真係非小琴呢啲外行人聽得明。


不過，證監噚日宣布，上訴法庭准許將單案移交終審法院審理，終審法院須決定，原訟法庭係咪擁有司法管轄權，裁定Tiger Asia係咪違反有關條例，抑或由市場失當行為審裁處或刑事法庭裁定有人違反法例。簡而言之，證監打虎打到去終審法院，是得是失都叫終點在望了。


email:piano@mingpao.com