耀才新廣告 借渾水抽水

【明報專訊】渾水（Muddy Water）今個月頭再寫「死亡筆記」，話香港有「欺詐學院」，仲點咗幾間會計師樓、證券商嘅名添，小琴噚日睇報紙時就發現，原來唔止渾水要攞內地民企開刀搵食，連一向多搞作嘅耀才證劵都要借題「抽水」賣廣告。


「要慎選證劵行 勿沾渾水」

事緣耀才新出嘅全版廣告，大大隻字提配啲投資者「要慎選證劵行，勿沾渾水」，下面仲配咗幅卡通圖，有隻邪惡紅色大蛇喺間「XX證券」出面，「擔」住個投資者要「成隻吞咗」佢，咪話唔得人驚。


幅圖係唔係意有所指就唔知啦，早前就有間致富證券，畀人點名話幫啲問題民企上市，管理層「拿拿聲」強調自己只係協助民企、聯絡上市的專業機構，冇保薦公司上市等工作，堅持自己清白冇造假。