分析員讚李小加反被窒

【明報專訊】港股舊年底大插水，直接令到港交所（0388）全年業績大走樣。面對咁嘅表現，仍然有分析員喺港交所嘅業績會上，公開讚李小加管理得好，只可惜欣賞之詞喺李小加聽來反而有啲刺耳，呢位分析員馬屁拍不成，倒被李小加窒。


對自己表現有清楚認識

噚日，喺港交所業績會嘅答問環節上，有個分析員一開腔就恭喜李小加，話祝賀你今次嘅全年業績，話未講完就被李小加反問，恭喜我乜嘢？（業績）持平咩？現場即時爆發一浪笑聲。


俗語講，拍馬屁最高境界係不露痕迹，而最差嘅就係讓對方覺得你講緊反話。雖然小琴唔知呢位分析員係真想捧下李小加而等他講多啲嘢，定係寸人唔得反被寸，但最少都可以睇出，李小加對自己嘅表現都有清楚認識。


「留給我的都是先苦後甜改革」

業績會全程，李小加都強調港交所真正嘅任務，係為內地資本市場開放做定準備，話現時最大嘅風險係「中國行得太快，而香港又追不到（中國）。」


臨尾，李小加都要為自己訴下苦，話現時港交所計劃緊嘅不少戰略改革，全部都係先苦後甜：「先甜後苦的改革，前面的人都做完了，留給我的都是先苦後甜的事情了。」


email:piano@mingpao.com