殯儀股搞埋音樂學院

【明報專訊】近年香港上市公司愈搞愈多花款，而且搞開一樣仲可以搞多一樣，前年先變身做殯儀股嘅香港生命（8212）噚日就公布，收購香港著名音樂人伍樂城有份創辦嘅伯樂音樂教育學院49%股權，咁小琴又嚟出吓題目畀大家估吓，殯儀生意加音樂等於乜嘢呢？答案: a: 吹啲打；b: 送行曲；c: 兩者皆是；d:全部不是。


香港生命今次收購音樂學院嗰4704萬元入面，只有204萬元係用現金支付，剩番嗰4500萬元就用承付票據支付，附帶年息6厘。伯樂音樂教育學院而家係由兩家離岸註冊公司Beyond Asia同United Value分別持有75.5%同24.5%，其中伍樂城係由United Value委任做音樂學院董事，今次香港生命就係向Beyond Asia收購49%股份，完成後會成為學院嘅大股東。


林夕金培達都是導師

不過，小琴平時睇上市公司收購嗰陣，啲公司最鍾意就係講協同效益，睇返呢家伯樂音樂學院嘅導師名單，來頭原來的確唔講得笑，除咗伍樂城本人之外，仲有香港著名填詞人林夕、攞過唔少最佳電影配樂獎項嘅金培達等等，但係香港生命主要業務係搞殯儀，咁唔知收購完成咗之後，伍樂城、林夕同金培達會唔會合作搞番首歌，等香港生命喺搞葬禮嗰陣嚟用呢？

email:piano@mingpao.com