新航747退役 早過國泰

【明報專訊】新加坡航空公司噚日話，公司最後一架波音B747-400客機，將喺今年4月6號光榮退休，標誌喺新航服務咗近40年嘅波音B747家族正式退出歷史舞台。為咗同昔日「空中女王」道別，新航將喺4月6號由香港開出一班特別紀念航班，所有搭乘該航班嘅旅客都會收到一架747飛機模型，仲有特別安排嘅機上娛樂同機場派對活動。


耗油勁噪音大 淘汰係必然

新航香港區總經理謝能達就話，雖然不捨得告別「空中女王」，但考慮到波音747耗油勁、噪音大，淘汰747都係必然嘅事。其實講開747，呢排都發生唔少事故，早前就有市民要求用緊21架747-400客機嘅國泰航空（0293），交代事故根源。不過，國泰員工就同小琴派定心丸，話嗰啲事故都冇乜關聯，而全球現時有650架747喺天上飛緊，國泰都計劃慢慢淘汰747，只不過要到2017年先退晒。