卡塔爾靠賣天然氣 成全球最富

【明報專訊】《福布斯》啱啱公布咗全球最富有國家/地區榜單，世界天然氣最大出口國卡塔爾，以8.8萬美元人均GDP，擠下盧森堡成為全球最富。我哋香港就排第8，人均GDP都有4.6萬美元，緊貼美國之後。中國大陸以7544美元排第94位。


福布斯今次以2010年人均GDP為指標，經過「購買力平價」調整後，將182個國家及地區排出貧富順位。細睇呢張榜單就會發覺，賣油、賣服務仍然係致富之道。譬如前十名國家中，卡塔爾、挪威、汶萊同阿聯酋都係靠石油同天然氣資源上位，而盧森堡、新加坡同香港就以避稅天堂，或者金融服務業跑出。


香港排第8 新加坡高踞第3

唯獨要注意嘅，係呢張榜單係經過「購買力平價」調整嘅，即物價平或者貨幣被低估嘅國家係有着數嘅。好似台灣今次話自己「超英趕德」、「連續兩年超越日本」，但如果用番實際匯率計算，台灣嘅人均GDP係唔到日本一半嘅。