亞果記者會火藥味濃

【明報專訊】最鍾意食橙嘅小琴，自從聽講有媒體爆出亞洲果業（0073）「年報作假」、「誇大業績」傳聞之後，呢兩日都有關注。噚日係亞果業績公布嘅大日子，公司介紹完啲財務狀况、進入問答環節之後，有個記者開始當場質問管理層，一啖氣提出5、6個疑點，而亞果財務董事宋治强都不甘示弱，一一反擊，場面都算火藥味相當重。


宋治强：超市唔賣亞果橙 唔到我哋管

眾多論點之中，小琴覺得最過癮嘅就係記者問到點解「去超市搵唔到亞果橙」，宋治强就話，公司職責係種橙，至於超市賣橙就「唔係我哋管到嘅事」。佢仲話，由於橙「皮厚」，雖然每年得年底有一次收成，超市都可以自己決定儲幾耐先拎出來賣，「如果大家7、8月仲食到新奇士，通常都已經冷藏咗大半年」。雙方繼續爭辯，真相如何小琴就暫時未知，不過起碼了解多咗樣嘢：橙係一種秋冬季節成熟嘅水果。