上商高息吸引父母開戶

【明報專訊】好多家長都會自細教小朋友理財，等佢哋明白金錢嘅重要性，如果喺教小朋友嘅同時，家長又可以有回報，咁就相得益彰喇！上海商業銀行就諗到呢條好橋，父母同子女齊齊開戶口儲錢，大家都可以享有年利率2.12厘，適用於人民幣同港紙呢！而家3個月嘅港元定存，最多都係1厘多啲，小琴計過呢個計劃都幾抵玩㗎！

存款適用於人民幣與港幣

講番個計劃詳情，其實好簡單，小朋友只要付出10港元，就可以喺上商開個兒童儲蓄戶口，而家長就要做個3個月嘅定期存款，港紙同人仔都得，港紙最少1000元，人民幣則最少1萬元，咁就大人小朋友嘅兩個戶口，都可以享有2.12厘嘅年利率喇，但要留意，呢個優惠價只適合於新資金，兒童儲蓄戶口上限係10萬港紙，父母嘅定存上限係30萬港元或人民幣，優惠去到4月30日。