匯豐贊助大學生創業

【明報專訊】小琴聽講，匯豐慈善基金決定贊助青年企業家發展局（YDC）舉辦「E挑戰杯創業計劃挑戰賽」，除咗會開放畀本地大學生報名，仲歷史性咁預埋另外5個亞太地區國家參與，搞場「跨地域大比併」。YDC主席梁劉柔芬議員噚日就話，比賽過程之中會有好幾場工作坊，而且啲Speaker全部都「唔畀講威水史」，凈係可以講自己創業史幾咁坎坷。梁太仲拿自己做例子，話自己都係「窮出身」，覺得就算而家租金幾咁貴、創業幾艱難都好，年輕人都唔應該「賴地硬」，應該學識「排除萬難」、一路堅持。


小琴估計，既然有咁犀利嘅Sponsor，如果贏到場比賽一定有唔少着數啦。後來真係打聽到，原來勝出者唔單止有獎金，仲可以喺香港科技園入面拎到硬件支持同埋專家輔導；如果個idea真係十分巴閉，仲有可能畀好似星探咁過來掘金嘅天使投資人睇上。可惜小琴已經唔係學生好耐，如果唔係都心郁郁想去玩下。