處理「重要事情」 唐唐酒會No Show

【明報專訊】連日成為傳媒追訪焦點嘅唐唐（唐英年），噚日傍晚原定出席喺港交所展覽廳舉行嘅金融界新春酒會，但係競選辦大約5點通知主辦單位，話唐英年因為有「重要事情」要處理而臨時缺席，令到一大班傳媒撲空。


事有湊巧，港交所（0388）主席夏佳理，據講因為「出差」，噚日都冇現身。心水清嘅讀者應該記得，身兼行會召集人嘅夏佳理都係「挺唐」一分子，早排嗰個千人挺唐大會，夏佳理就派咗太太出席。如果夏佳理噚日出來，恐怕都被人追住問仲挺唔挺唐喇。


另外一個出席酒會嘅「挺唐」人士「金勞詹」詹培忠，就表態繼續支持唐唐，認真忠心。不過，詹詹表態時，唐唐仲未同唐太出嚟見記者兼認錯，唔知各位挺唐人士睇完唐唐噚日嘅表現後，會否轉軚呢？