有共識送唐梁入閘

【明報專訊】由16個法律界選委候選人組成嘅「Team Legal 16」噚日舉行記者會，佢哋話，已經分別同兩名特首參選人唐英年和梁振英（CY）會面，初步覺得CY喺會面中準備得好啲，「略勝一線」，但就強調未有投票意向。
Team Legal 16主要由律師會嘅理事同委員會成員組成，被視為非泛民團隊，成員包括梁永鏗同熊運信等。佢哋話，前日用咗一個鐘見CY，感覺對方對貧富懸殊、行業發展等了解都比較深，亦準備得較好；唐唐就畀半個鐘同佢哋傾，令雙方無時間傾行業發展，就要講拜拜。
強調未決定投票意向
講就講到好似已經有偏好，不過佢哋強調，仲未決定投邊個一票，話要睇埋佢哋嘅政綱、班底同呢幾個月嘅表現先決定。至於提名，就有共識送兩個人入閘，話希望鼓勵競爭咁話。