綠城賣樓唔掂賣球隊

【明報專訊】泊上中國第一金主中投呢個大碼頭，綠城中國（3900）嘅處境似乎並未好轉，近日主席宋衛平好悲愴咁表態，願意轉讓已經經營咗13年嘅足球隊。出讓條件，第一係要球隊留喺杭州，唔係綠城隊，都要係浙江球隊；第二係要保留青少年足球，宋主席一番苦心讓人不禁唏噓。

宋衛平13年後萌生退意，而恒大地產（3333）許家印一年幾就已經企到中國足球頂峰。先投6億人仔拿到中超冠軍，再豪擲7億打造全球第一皇馬足球學校。呢份氣概無人匹敵，許總同樣唔擔心足球拖累公司業績，幾番對記者解釋，虧損只係起步階段，一兩年內便會扭虧為盈。

作為過來人嘅宋衛平可能好難贊同許嘅說法，綠城俱樂部13年投資10億元，平均每年8000萬元，但收入只得2000萬元，一路都要靠賣樓支撐。小琴記番起，同融創中國（1918）老闆孫宏斌食飯時，佢講起，有投資者見面第一句話就問佢，搞唔搞足球。孫總自稱非球迷，投資者立即釋然。