內房「好孩子」 富力最乖

【明報專訊】今日小琴要講一講「好孩子」，不過唔係舊年底上市嗰隻內地童車製造商，而係中國房產信息集團評出嘅「好孩子降價榜」。顧名思義，聽中央嘅話，響應樓市調控，做好孩子，就可以榜上有名啦。上榜嘅10個項目，一半出自本港上市開發商旗下。榮膺榜首嘅富力（2777）同另一間內房商恒大（3333）各自有兩個項目上榜添。

恒大「暗渡陳倉」 減價促銷

富力名列榜首乃情理之中，皆因主席李思廉都講到明話市况低迷，仲率先調低全年銷售額，因此劈價賣樓套現，早已經成為公司策略。事實上劈價策略又真係有用喎，今次海南富力盈溪谷6折發售，終於吸引到近600人報名團購，成效都算不俗。

萬科、恒大（3333）、碧桂園（2007）3間同樣榜上有名，但行事作風卻大不相同。龍頭老大萬科，霸氣十足，唔單止降價，仲要發表降價宣言，譴責舊業主要求退房或討還差價嘅行為「違背市場化原則」；恒大則行事離奇，連續兩次月報會見記者都強調「會適當調高售價」，卻暗渡陳倉，68折、76折促銷，其中清遠銀湖城，不計裝修，僅售2380蚊一平方米，真係平到笑呵呵；碧桂園，可算今年第一降，7月尾就以75折推售十里銀灘，小琴當時親身北上睇樓，先知道所謂75折完全係宣傳噱頭，今次上榜都姑妄聽之啦。

email:piano@mingpao.com