奕達遇家賊 損失千四萬

【明報專訊】正所謂「日防夜防，家賊難防」，相信專門生產硬碟機控制器、電腦主機板同及LCD電視控制器嘅奕達（2662）對呢句說話會感慨良多。話說佢哋噚日出通告，話響內地分公司一名財務經理同一名高級出納員涉嫌盜用公司資金1400幾萬元，東窗事發後集團已經報咗公安，出納就拉咗，但係個財務經理仲追捕緊。

點解會有家賊？奕達都仲調查緊，佢哋仲話，如果追唔返呢千幾萬，咁只可以計入公司下次公布嘅帳目入邊。講開又講，奕達呢排都算唔好彩，上個財年（截至今年6月）蝕咗6900萬元，早排泰國水災，佢哋響當地嘅廠房又要停產，家仲畀人「穿櫃桶底」，真係當黑囉。