新聞類別
財經
詳情#
【明報專訊】由一杯奶嘅面世都睇得出一國兩制。早前話最快年底就畀香港市民飲到自家品牌牛奶嘅現代牧業（1117），面世時間先係推遲到出年春節，家又話春節都保證唔到，但華東華南地區下個月就可以搶先推出。
鄧總：奶味較淡 因為新鮮
集團董事長鄧九強就話，「現代牧業」牌牛奶登陸香港嘅準備工作一切就緒，凈係差食環署嘅一張入境紙啫。其實，單以食品安全嚟講，回歸十幾年都未學番中國速度嘅香港，算唔算一件幸事？
現代牧業噚日特登運咗三大箱「現代牧業」牛奶畀小股東試飲。小琴試咗就覺得同出邊啲高檔奶比好似淡咗啲，鄧總聽後就話出邊啲奶因為唔新鮮，廠家落嗰啲添加劑同埋細菌，齊齊經高溫一消毒，牛奶就變「濃」喇。睇嚟以前我哋都被糊弄咗喎。
話說小琴逢親見到鄧總，都會聽佢重溫現代牧業喺日本澳美同行面前點樣威水，又或者溫總視察牧場時點樣鼓勵佢要崛起民族品牌。臨走前佢又一定唔忘叮囑邊個屋企有半歲至一歲BB嘅，拎多兩盒奶返去代替奶粉。
鄧總介紹，呢排入冬季後，牧場將有2萬頭牛進入產犢高峰期，加上家產緊奶嘅5萬頭，嚟緊呢段時期原奶產量又要大幅增加，另外仲有2萬頭澳洲牛犢坐緊船踏浪而來。不過，同行見到集團擴張咁神速，慢慢都搶外國奶牛。而今年牛犢價錢已經升咗兩成到每頭2萬人仔，計埋澳元升值之後，奶牛真係愈來愈矜貴。
email:piano@mingpao.com
回應 (0)
