廣東首公布省PMI 低過全國水平

【明報專訊】中國噚日公布進出口數據，出口額增長兩年來最差，班珠三角廠佬亦都牙痛咁聲。原來喺同一日仲有一個有關製造業嘅數據出爐，就係「廣東省PMI（製造業採購經理指數）」。你冇睇錯，小琴都冇寫錯，唔係全國PMI，而係廣東自己一個省份嘅官方PMI，由廣東省經濟和信息化委員會統計省內417間企業得出數據，係全國首個「省級PMI」，試行幾個月後，噚日正式對外公布10月份嘅PMI，以後就每月第一個政府工作日公布。

全國首個「省級PMI」

雖然有頭彩，但第一次公布嘅數據就麻麻，得49.76%，既少過全國50.4嘅水平，亦低於50%，即係陷入衰退；其他細項好似生產指數、新訂單指數、新出口訂單指數等等亦都回落，而且回落幅度比全國指數更大，證明當地製造業前景真唔多好。