地產代理打街霸 風氣蔓延上海

【明報專訊】香港地產代理有所謂打街霸，意即代理要企街截車攔客，估唔到呢個風氣家仲蔓延到內地。市况不景之下，為咗搶客，上海有一批代理走上高速公路攔客，可謂險象環生。

內地樓市冰封，唔止地產商頭痛，代理都搵食艱難。聽講不少「金牌銷售員」都已轉行，有人轉攻網絡服裝生意，亦有人返家鄉務農。留低嘅代理，唯有要搏命搵客，小琴睇到網上片段，有上海代理要衝上車輛繁忙的交通要道，向司機兜售賣樓廣告。

據聞，呢啲代理主要工作係推介附近一個新開樓盤，每日人工60蚊人仔，如果成功拉到客，另加提成。熙熙攘攘車流當前，佢哋面無懼色，以血肉之軀攔截汽車，然後向司機派發傳單，再力圖說服司機尾隨睇樓。

攔車派傳單賣樓

小琴諗起小悅悅事件，覺得內地攔車風險實在太大。司機可能扮睇不到，橫衝直撞過咗去；撞到人都可以扮唔知，揚長而去。為咗啲賣樓提成，賠條命實在划不來。