上實老總忘申報

【明報專訊】唔少人都試過大頭蝦唔記得咗某啲嘢，好似上實（0363）副董事長兼行政總蔡育天咁，今年5月就買咗兩次股票，但唔記得申報搞到違規，個官就接受佢話因為公幹大頭蝦無申報嘅解釋，從輕發落罰咗佢4000蚊，同差唔多2萬蚊嘅調查費用。不過，小琴睇返蔡總當日買返嚟批股票，到家粗略估計帳面都輸咗近50萬，難怪個官罰得咁輕手啦。

睇返上實公告，蔡總原來喺上年5月6日同12日買咗一共10萬股上實股份，但就未有跟足規矩喺買賣完成後3日內申報而違規，蔡總就解釋當時因為出外公幹先無即時備案，裁判官都相信佢係無心之失，最後判罰款同支付調查費用，盛惠一共23,714蚊。

睇返資料，上實股價喺上年5月6日同12日，分別係32.1同30蚊，就當蔡總10萬股成本都係用每股30蚊買，大大話話都用咗成300萬，但係截至噚日收市，上實股價已經跌到得番25.15元，即係話蔡總呢批貨帳面已經蝕咗48.5萬，同啲罰款同調查費用比較，真係蚊髀同牛髀。