大連沃爾瑪 惹租霸惡名

【明報專訊】呢排外資企業響中國嘅業務似乎頭頭碰着黑，之前Gucci深圳店被指刻薄員工，驚動到勞動部門，早輪沃爾瑪重慶多間分店更被踢爆用普通豬肉冒充高檔豬肉，搞到全市分店要停業整頓15日，中國區總裁陳耀昌仲響事件後離職。但似乎沃爾瑪衰運未完，前兩日央視新聞大踢爆，指摘沃爾瑪大連分部租咗個商場舖成10年，竟然1分錢租金都未交過，前後拖住成億數，雖然當地法院呢6年嚟多次居中協調，但係沃爾瑪一於好少理，堅持既唔肯合作，又唔服從裁決嘅態度。

件事要追索到1999年，沃爾瑪租咗萬國購物廣場嘅舖位開店，雙方承諾舖位由廣場方負責按沃爾瑪要求建設，租金每年1000幾萬元。

2002年，舖位交收，但沃爾瑪一直唔交租，結果雙方鬧上法庭。值得一提係，呢10年嚟廣場間舖一直丟空，沃爾瑪響果邊冇做過生意。

沃爾瑪話，因為廣場冇按要求完成工程，拒絕履行合約，但法庭了解發現，之所以有部分工程未完成，原因其實係沃爾瑪唔肯配合廣場方所致，所以認為沃爾瑪應該履行合約。

沃爾瑪：對方沒按要求完工

但係呢幾年來，法庭想調解，沃爾瑪一係就派個十問九唔知嘅代表敷衍，一係突然換代表，又拖拖拉拉唔肯將相關文件交畀法庭，極唔合作嘅態度，令到單官司搞咗幾年都未有結果。

件事鬧到上央視咁嚴重，沃爾瑪噚日立即發聲明，話因為對方唔按時交舖，既無施工許可證，後來仲畀工商部門吊銷營業執照，先至向對方提出解約；沃爾瑪仲話，佢哋有6100萬資金因此付諸東流，所以先決定另覓合作伙伴。