內地肯德基 一年加三次價

【明報專訊】內地通脹快回落，你信唔信？不如睇吓同民生息息相關嘅連鎖快餐行業做緊乜。

內地傳媒報道，喺全國分店網絡龐大嘅肯德基（KFC），上周六又加價，呢個已經今年第三次，對上一次只不過係一個月之前。肯德基表示，今次加價涉及嘅係飲料和雞肉類食品，加幅介乎0.5至1元人民幣不等，因應地區而定。公司同時表示，而家開始會實行差別定價策略，即係話不同餐廳嘅價格都可能唔同。

其實唔止肯德基，小琴留意到近排內地好多連鎖快餐店都爭住加價。7月中，肯德基最大嘅競爭對手麥當勞，亦宣布部分產品提價0.5至2元人民幣。同月另一家國產連鎖快餐店真功夫又跟風加價0.5至1元人民幣，結束咗佢三年無漲價嘅記錄。連大品牌都頂唔順，更加唔好話細餐廳。內地官員學者成日話通漲緩和，不如你哋去食下肯德基先啦！