澳門銀河業績靚

【明報專訊】銀河娛樂（0027）上個禮拜公布咗第三季營運數據，個業績相當「靚仔」，副主席呂耀東嘅心血結晶澳門銀河度假城居功不少，皆因第三季係呢個新project開張後第一個完整季度。小琴噚日問Francis（呂之洋名），個新場做得咁好，咁第二期諗住點搞呢？Francis就話，銀娛作風比較科學化，想收集多啲數據，再決定第二期規劃同埋市場定位等等。

睇數據再規劃第二期

澳門銀河5月中開張，到家都好幾個月，加上咁鬼旺場，咁多市場資訊都唔夠用？Francis好謙虛咁話，澳門銀河係「新坑」（即係「新屎坑」啦），剛開張頭3個月啲表現不能作準，可以丟晒果啲數據，所以要睇多一排，起碼去到今年年尾或明年初，再分析返盤數同埋客戶反應，先可以為第二期籌謀。

濠賭股今年表現標青，雖然近呢個幾月因為市况波動，加上市場擔心澳門賭業收入見頂，近排回落唔少。Francis唔肯具體估吓明年濠江賭業收入增長幾多，不過就同小琴分析，用美國人口除以拉斯維加斯嘅賭枱數目，大約係每100萬人有64張賭枱，而中國人口對澳門賭枱數目，就每100萬人得唔夠4張，即係話澳門賭業收入有排未見頂喎！