新聞類別
財經
詳情#
【明報專訊】近排全球股市生意淡薄，港交所（0388）都要諗新服務搵銀。日後上市公司嘅大日子，不妨考慮吓參加港交所最新推出嘅開市儀式「敲銅鑼」威一威，包埋酒會使費，3.8萬元埋單。上市公司若嫌自己知名度唔夠高，亦可以搵港交所幫手搞投資者推廣會，盛惠2.8萬元。
上市公司喜慶就可參加
小琴平時睇好多名人，喺美國紐交所開市前敲鐘仔，不知幾威水。港交所則想學上海交易所咁，以「銅鑼」代替「鐘」，搞開市儀式，等公司管理層可以過一過癮，以銅鑼聲號令全港開市。但凡上市公司遇上喜慶日子，例如係成立50周年等等，就有資格參加，套餐盛惠3.8萬元。包咩服務呢？據港交所講，開市儀式同現在嘅新股上市儀式，都幾相似，同樣有酒會，美中不足係，上市公司負責人唔可以落交易大堂演說，只可以喺港交所二樓敲銅鑼。若果想留番個紀念，港交所亦會將儀式嘅錄像及相，上載到交易所網站，認真體貼。
港交所發言人話，交易所將會喺下年裝修翻新，到時會將開市儀式「升級」，暫未有詳情。佢話，若然有新股上市，「開市儀式」就一定要讓路畀新股，港交所亦正研究點樣改善吓現有嘅上市儀式，有機會畀新股管理層參加敲銅鑼。由於港交所嘅新服務仍在籌備當中，幾時會面世，仍有待公布。
搞研討會 助業界「認識上市公司」
另一項平啲嘅服務就係收費2.8萬元嘅「認識上市公司」研討會。據港交所講，好多公司其實都會有興趣，提升吓知名度，於是決定由屬下上市推廣部出手，每次幫幾家上市公司，搞一場有主題嘅研討會，等香港嘅機構性投資、基金經理等等嘅專業投資者，可以趁機了解多啲唔同行業、公司，但散戶就暫時無份參加喇。港交所呢個舉動，相信會搶去唔少做投資關係嘅中介飯碗，時移勢易，踏入下半年，搵食認真艱難。
email:piano@mingpao.com
回應 (0)
