渣打開高檔旗艦店

【明報專訊】蘭桂坊噚日出現咗一批型男索女，現場又舞獅打鼓，小琴仲以為以夜生活聞名嘅「老蘭」又多一個夜場呢，見到個場主色係綠拼藍，先知原來係渣打香港喺中環新開嘅旗艦店。

間舖樓高4層兼走高檔路線，加上每層都因應客戶群有唔同感覺，聽講呢間新嘅旗艦店比起一般分行，吸新客能力多1倍呢！

新旗艦店咁貴格，當然會有高端客嘅專用嘅服務，例如有免費咖啡、朱古力款待，行中環行到腳仔軟都可以入去歇一歇，而地庫就係比一般客戶用嘅。

有免費咖啡朱古力

渣打香港個人銀行業務主管Mary禤惠儀話，呢種旗艦店嚟緊仲會開3、4間，遲啲喺旺角、尖沙嘴、灣仔都會面世。渣打今年斥成1億元重新翻新分行，家已完成60間、即大概四分之三嘅分行網絡已經完成。